That’s the Team…

Z`Prag woa an Zeili und an Felix ziemlich fad,
hom ned gwusst wo se duat wos dad.
Do homsase spontan wos ausgedocht:
Heid wiad nu a Gaudi gmocht.

Iaz hans schnoi vom Bett ausa greid,
zu de ondan Zimmer woas jo ned weid.
Woa zwoa scho spät ada Nocht,
se hom eana oba trotzdem aufgmocht.

Do heanses zruck im Zimmer klopfm an da Tia,
ned z`laut is jo scho ada Fria,
eitrudlt hans olle, noch da Reih,
Susi, Eva, Rexi, Lisa, Hasi und da Franzi woa a dabei.

Oba hoppala do foin jo oa!
Da Andi und Kathi, wo han den de zwoa?
Se san zwoa ned im soiben Stock gleng,
oba olle woan se sicha, dass de anu kema meng.

Ohne se, des geht jo nicht,
zum Glück gibt`s sowos wia a SMS-Nochricht.
Da Franzi hod glei ogfont zum Schreim,
da Weg wa kurz, wo de wieder bleim.

Drin gstondn is natürlich da Ort,
sowie da Zeitpunkt und zwoa sofort.
Wichtig wa a, wea da Obsender is,
ocht Nomen han z`vui, des woa gwiss.

„Das Team“ duads a, hodse da Franzi docht,
hoda natürlich a so gmocht.
Des woitn se de zwoa aned entgeh lossn,
homse glei zum obi geh entschlossn.

Kinnts eich voastoin, dass do lustig woa,
de richtigen woan beinond, des woa kloa.
Des nexte Moi homs an Josef aufgnuma,
verbrocht homs zusommen den gonzn Summa.

An Haufm Aktivitäten homs zusommen gmocht,
owei spontan, am Tog und ada Nocht.
„Das Team“, so neannan sase heid,
und anu für a ewig longe Zeit.

Sowos spricht se herum, des geht owei schnoi,
drum hods a Erweiterung gem beida Mitgliederzoi.
Für uns neiche a Grund zum Gfrei,
und a Ehre do dabei zum Sei.

D`Maria und d`Meli homses als Erste ogschaud,
se woan so mutig und homse des traud.
A da Luki hod gmoand, „Das Team“ live erlebm,
des muas mase jo amoi gem.

Bei Oidhomern is hoid aned bliem,
sogoa vo Treiboch hods wem zuba triebm.
Ohne Team wissat d`Stephi ned wos dad,
wei dahoam is hoid auf Dauer fad.

Z`Weng homses kend vom song und hean,
da Raschi, d`Mari & d`Rami hom ned gmoand, dass amoi dazua kean
A wias nuned dabei woan, daugt hods eana beim Team owei,
mittlerweile, dank der freundlichen Aufnahme, sans a dabei.

Jeds Wochenende wird wos untanuma,
und a amoi des oane oda ondare Glasal drunga.
Geht’s uns unta da Wocha ned guad, fias Wochenende hama fit!
That`s the Team…we like it.

Wir danken Ramona Werni, die uns dieses Gedicht geschrieben hat!